خبریں

بزنس کمیونٹی کو مایوس نہیں کروں گا‘ صنعتکاروں اور تاجروں کو لے کر چلیں گے‘ انجینئر مقصود انور پرویز

01 October 2019

سرحد چیمبر آف کامرس اینڈ انڈسٹری کے نو منتخب صدرانجینئر مقصود ا نور پرویز نے کہا ہے کہ وہ صنعتکاروں اور تاجروں کو ساتھ لے کر چلیں گے اور ان کی مشاورت سے مسائل کے حل کے لئے حکمت عملی وضع کی جائے گی۔ چیمبر کی صدارت کسی چیلنج سے کم نہیں۔ بزنس کمیونٹی کو مایوس نہیں کروں گا۔بزنس مین فورم کے لیڈر سینیٹر الیاس احمد بلور نے جس اعتماد کا اظہار کیا ہے اس پر پورا اترنے کی بھرپور کوشش کروں گا۔ ان خیالات کا اظہار انہوں نے سرحد چیمبر کا عہدہ صدارت سنبھالنے کے موقع پر منعقدہ سالانہ جنرل باڈی اجلاس سے خطاب کرتے ہوئے کیا۔ اس موقع پر بزنس مین فورم کے لیڈر سینیٹر الیاس احمد بلور ٗسرحد چیمبر کے سبکدوش ہونیوالے صدرفیض محمد فیضی ٗ سبکدوش ہونیوالے سینئر نائب صدر انجینئر سعد خان زاہد‘ سبکدوش ہونیوالے نائب صدرحارث مفتی‘ نو منتخب سینئر نائب صدرشاہد حسین‘ نو منتخب نائب صدر حاجی عبدالجلیل جان ٗسرحد چیمبر کے سابق صدور‘چیمبر کی ایگزیکٹو کمیٹی کے ممبران ٗ الیکشن کمیشن کے ممبران ملک نیاز احمد‘ محمد اقبال اور عابد اللہ خان سمیت تاجر تنظیموں کے صدور‘ جنرل سیکرٹریز اوربزنس مین فورم کے اراکین سمیت کاروباری افراد بڑی تعداد موجود تھے۔انجینئر مقصود انور پرویز نے اجلاس سے خطاب کرتے ہوئے تاجروں ٗ دکانداروں اور صنعتکاروں کو نامساعد حالات میں کاروباری سرگرمیاں جاری رکھنے پر زبردست الفاظ میں خراج تحسین پیش کیا اور کہا کہ دہشت گردی اور انتہا پسندی سے متاثرہ تاجر برادری کو ہر ممکن ریلیف دلانا ان کی ترجیحات میں شامل ہیں۔انہوں نے کہا کہ وہ صنعتکاروں اور تاجروں کو ساتھ لے کر چلیں گے اور ان کی مشاورت سے مسائل کے حل کے لئے حکمت عملی وضع کی جائے گی۔انہوں نے کہا کہ بزنس مین فورم اور کاروباری طبقے نے انہیں بلا مقابلہ صدر منتخب کرکے جس اعتماد کااظہار کیا ہے اس پر پورا اترتے ہوئے انہیں مایوس نہیں کرو ں گا۔انہوں نے ایک سالہ دور صدارت میں اپنے لئے رکھے گئے اہداف سرحدچیمبر کے اراکین کے سامنے پیش کئے اور یقین ظاہر کیا کہ وہ انہیں حاصل کرنے کے لئے ہر ممکن اقدامات اٹھائیں گے۔ انہوں نے کہا کہ صوبے میں معاشی انقلاب لانے کیلئے ٹیکس نظام میں اصلاحات ٗ ٹیکس نیٹ میں اضافہ ٗ انڈسٹریلائزیشن اور سرمایہ کاری کے فروغ ٗ ٹیکس دہندگان کو مکمل عزت دینے ٗ صوبے کے پوٹینشل سے استفادہ حاصل کرنے اور افغانستان ٗ ایران اور چین سمیت دیگر ممالک کے ساتھ تجارتی روابط کو فروغ دینا ہوگا۔ سرحد چیمبر کے سالانہ جنرل باڈی اجلاس سے سبکدوش ہونیوالے صدر فیض محمد فیضی نے بھی خطاب اور ایک سالہ دور صدارت کے دوران چیمبر کی سطح پر ہونیوالی سرگرمیوں کی تفصیلات بیان کیں۔ انہوں نے کہا کہ نو منتخب صدر انجینئر مقصود انور پرویز بزنس کمیونٹی کی مشکلات کے حل کیلئے اقدامات اٹھانے کی بھرپور صلاحیت رکھتے ہیں اور وہ بزنس کمیونٹی کو مایوس نہیں کریں گے۔ اجلاس سے خطاب کرتے ہوئے بزنس مین فورم کے لیڈر سینیٹر الیاس احمد بلور نے سبکدوش ہونیوالے صدر فیض محمد فیضی کو بزنس کمیونٹی کی بھرپور انداز میں خدمت کرنے پر خراج تحسین پیش کیا۔ انہوں نے نو منتخب صدرانجینئر مقصود انور پرویز کیلئے بھی نیک خواہشات کا اظہار کیا اور کہا کہ بزنس مین فورم کاروباری طبقے کی بے لوث خدمت پر یقین رکھتا ہے اور اسی جذبے کے تحت آئندہ بھی انہیں ہر ممکن ریلیف دلایا جائے گا۔

 

 

خبریں
NEWS